Mae digonedd o feysydd pebyll ar hyd y Llwybr. Mae’n bosibl cerdded a gwersylla ar hyd y llwybr i gyd.

Gweler y map rhyngweithiol i weld lleoliadau meysydd pebyll.

Gellir mwynhau Llwybr Glyndŵr ar unrhyw adeg o’r flwyddyn.

Yn yr haf ceir diwrnodau hir (ac weithiau poeth) ond mae’n well gan rai flodau gwyllt y gwanwyn neu liwiau ysblennydd yr hydref.

Yn y gaeaf, mae’r Canolbarth o dan orchudd o eira’n olygfa drawiadol. Fodd bynnag, rhaid cofio hinsawdd Cymru a’r ffaith y gall fwrw glaw ar unrhyw adeg, a bod rhai lletyau ar gau yn y gaeaf. Felly mae’n bwysig cario dillad priodol. Cofiwch hefyd mai cyfyngedig yw oriau golau dydd yn y gaeaf (dim ond rhyw wyth awr yng nghanol y gaeaf).

Mae un peth yn sicr – pryd bynnag y byddwch yn cerdded arno, bydd yn brofiad bythgofiadwy.

Rydyn ni’n argymell mynd ag arweinlyfr a map gyda chi.

Mae arweinlyfr Cicerone yn cynnwys mapiau 1:50000. Dim ond mapiau wedi’u tynnu â llaw sydd gan arweinlyfrau eraill. Gall fod yn dipyn o gamp cael hyd i’r ffordd ac rydyn ni’n argymell i chi gario map 1:25,000 yr Arolwg Ordnans yn ogystal â’r arweinlyfr o’ch dewis. Mae Harvey Maps yn bwriadu cyhoeddi map penodol ar gyfer Llwybr Glyndŵr yn y dyfodol agos, a fydd o gymorth mawr.

Maps and guide books page

Os ydych chi’n defnyddio GPS gwnewch yn siŵr bod y ffeiliau GPX cywir gennych chi, yn ddelfrydol oddi ar y wefan hon. Mae ffeiliau GPX ar gael ar wefannau eraill ond nid yw’r rhan fwyaf ohonyn nhw’n fanwl gywir.

GPX download

Am ei fod yn un o’r Llwybrau Cenedlaethol, mae digonedd o arwyddion ar hyd Llwybr Glyndŵr. Fe welwch symbol adnabyddus y fesen ar gamfeydd, gatiau ac arwyddbyst. Dyma’r symbol a ddefnyddir gan holl Lwybrau Cenedlaethol Cymru a Lloegr. Hefyd fe welwch ddraig, sef y logo ar gyfer Llwybr Glyndŵr, a ddatblygwyd gan Gyngor Sir Powys.

Byddwch hefyd yn gweld y symbolau canlynol ar y Llwybr neu ar lwybrau sy’n cysylltu ag ef, y gall cerbydau, marchogion, beicwyr neu gerddwyr eu defnyddio fel y dangosir.

Defnyddir mesen, symbol Llwybrau Cenedlaethol Prydain, i lywio’ch taith trwy ddangos y llwybr mewn amrywiaeth o ffyrdd. Fe’i defnyddir ar y cyd gyda saethau lliw neu’r geiriau ‘llwybr troed’, ‘llwybr ceffylau’ neu ‘gilffordd’ i ddangos pwy all ddefnyddio hawl tramwy penodol.

Mae’r saeth felen yn dangos llwybr i’w ddefnyddio gan gerddwyr. Mae’r geiriau ‘llwybr troed’ a/neu saeth felen yn dangos llwybr i’w ddefnyddio gan gerddwyr yn unig, a lle mae’n anghyfreithlon beicio, marchogaeth ceffyl neu yrru cerbyd heb ganiatâd y tirfeddiannwr.

Mae’r saeth las yn dangos llwybr y gall cerddwyr, marchogion a beicwyr ei ddefnyddio. Mae’r geiriau ‘llwybr ceffylau’ a/neu saeth las yn dangos llwybr y gall cerddwyr, marchogion a beicwyr ei ddefnyddio, ond lle mae’n anghyfreithlon gyrru unrhyw gerbyd heb ganiatâd y tirfeddiannwr.

Mae’r saeth borffor yn dangos llwybr y gall cerddwyr, marchogion, beicwyr a gyrwyr car a cheffyl ei ddefnyddio. Mae’r term 'cilffordd gyfyngedig’ a/neu saeth borffor yn dangos llwybr y gall cerddwyr, marchogion, beicwyr a gyrwyr car a cheffyl ei ddefnyddio, ond lle mae’n anghyfreithlon gyrru unrhyw gerbyd modur heb ganiatâd y tirfeddiannwr.

Mae’r saeth goch yn dangos hawl tramwy y gall cerddwyr, marchogion, beicwyr a modurwyr ei ddefnyddio’n gyfreithlon. Mae’r gair ‘cilffordd’ a/neu saeth goch yn dangos hawl tramwy y gall cerddwyr, marchogion, beicwyr a modurwyr ei ddefnyddio’n gyfreithlon.